Ni 5: Zeizah Man Dah Na Si?

Cun zultu pahleihnih lak i pakhat, Judas Iskariot timi kha, tlangbawi upa pawl sinah khan a va kal I “Jesuh cu nan kut chung i kan chanh hna ahcun zeidah nan ka pek lai?” tiah a va ti hna. Cucaah ngun tangka sawm thum kha an rel i an pek. Cu ri cun Judas nih khan Jesuh rawinak ding caan rem kha a bawh (Mathai 26:14-16).

Hmanung zanriah einak inn an phanh hlan te khan Judas Iskariat nih Jesuh leirawi ding a rak timh diam cang. Zanriah an ei pah ah cun Jesuh nih Judas nih a leirawi lai nak ding cu a chimh hna. Cu hnu rawl an ei dih ah khin, Jesuh nih Judah cu: “Na tuah ding mi cu khulrang in tuah ko” tiah a kal ter (Johan 13:27). Suimilam caan tlawmpal ah Judas cu Rom ralkap le tlangbawi pawl he Jesuh tlaih awk ah an phan colh.

Zeicahdah Judas Iskariat nih Jesuh a leirawi hnga? Hi biahalnak hi kum 2000 leng tiang zumtu pawl an i al lengmang mi a si. Micheu nih an ruahdamh mi cu Judas Iskariat kha Zealot ti mi phun tanh a si. Jesuh a zulhnak cu Rom uknak kha Jesuh nih a Messiah thawnnak in a tei lai i Israel miphun luatnak a kan phorh lai tiah a zumh. Nain, cu a zumhnak cu Jesuh cawnpiaknak le tinh mi a si lo ti a hngalh tikah a thin hun in Jesuh arak leirawi nak a si an ti. Micheu nih an ruahdamh ve mi cu: kha ti a leirawi tikah Jesuh nih a Pathian thawnnak in Rom uknak le Judah biaknak upa pawl kha a tei hna lai ti mi ruahchannak ruang ah a si an ti. A si kho ve mi pakhat cu, hmanung zanriah an ei lio ah Jesuh nih a mawhchiat ruang le a zultu dang he an i hmuhthiam pah lo ruang ah a thinhun in a leirawi mi a si tiah an ti. Hi ruahdamh mi nih a langhter mi cu: Judas Iskariat kha a zumhnak nih si loin, a politics tu nih arak mawngh deuh. Cu bantuk cu nihin kanmah lak zong ah hmuh khawh lengmang a si.  

Zeiruang ah Judas Iskariat nih Jesuh a leirawi ti cu a dihlak in kan hngal kho lai lo. Nain, a fiang mi pakhat cu, Thawngtha pali nih an kan chimh bang in, Judah Iskariat kha phaisa a duh mi a si an ti. Johan tialnak ah cun Judas kha Jesuh zultu lak i phaisa kengtu a si i, an phaisa a fiar pah tawn ti a si (Johan 12:4-6). Mathai nih cun, Judas nih tlangbawi ngan kha a va fuh i, “Jesuh kha na sinah ka leirawi ah zeidah n aka pek lai” tiah a ti (Matt. 26:15). Cu tikah ngun tangka sawm thum—cu chan lio minung pakhat zerh nga nihlawh man—an pek.

Tangka nih hin kan chung ah phun dang ngai rian a tuan theo. Lamkaltu Pawl nih cun, “tangka duhnak cu sualnak vialte i a hram a si” tiah fiang tein a tial (1Tim. 6:10). Jesuh zong kha sehtan nih khan mirum si ding in arak tukforh. Sihmenhsehlaw, Jesuh nih cu tukforhnak cu a tei. Jesuh nih minung nih ngeihchiah chawva kan duhnak ruang ah kan ton mi harnak kong hi arak chim lengmang. Nihin zong ah cu tukforhnak phun cu mirum le mingei hakkau hna lakah kan hmuh lengmang.  

Jesuh nih hakkauhnak he pehtlai in bia a chim mi a um pah lengmang. Mirun tlangval pa kha hakkauhnak nih a temtawnnak chung in a luat khawh nak ding lam pakhat lawng a ngeih mi cu: a ngeih mi chawva vialte kha mi sifak a thenh khawh hna lawng ah a si. A dang hakkauhnak kong ah Jesuh nih, minung nunnak taktak cu vawlei chawva le thilri ah hin a si lo tiah a ti (Luka 12:15). Hi Jesuh Khrih bia hi hakkauhnak le duhfahnak nih a nenh mi zumtu paoh ca ah cinken awk le lung kil ah i chiah camcin awk a si.

A fiang ngai mi cu, tangka duhnak le hakkauhnak cu Pathian kan dawtnak he a ralkah mi an si. Judas kha cu a tangka duhnak le hakkauhnak nih Jesuh Khrih a dawtnak kha an tei. Cu tikah duhsah tein zultu hna tangka kha a fiar i a hnu ah cun Jesuh leirawinak tiang kha a phan. Mi hngalh lo kar le a thlithup in arak fiar mi kha a hnu ah cun thuh le kham awk a tha ti lo. Kum thum kheng te a hnu arak zulh mi a Bawipa Jesuh Khrih kha ngun tangka sawm thum ah a zuar diam ko. Tangka a duhnak nih a khuaruahnak mit a cawt ter diam ko. Kanmah cio zong Judas bantuk in tangka duhnak nih a kan tei caan a um len ve men lai. Pathian nih thluachuah a kan pek tluk in amah Pathian sin lila ah kan pek sian lo caan a tlawm lai lo. Kan nun pawcawmnak ca i rian kan tuan, chaw kan leh nak ah ningcang loin kan tuah mi a um len ko lai. Cun kan nunnak hi thilri le vawlei chawva ngeihchiah in kan tah caan a um ko lai. Bible nih a kan cawnpiak mi le ralrin a kan pek mi cu duhfah hakkauhnak kha hrial i zuam i Pathian hmai ah zumhawktlak le dingfel tein nun hi a si. Cu cu nifa te kan i zuam ding kan rian nganbik a si.

Thlacamnak:

Maw Bawipa, tam deuh ngeih ka duh ruang ah ka zumhnak ka kaltak tawn ca ah ka ngaithiam hram. Ka nunnak hi vawlei chawva le thilri ah aa hngat lo ti run ka hngalhter law, nangmah kha ka sining dihlak le ka ngeihchiah dihlak in kan rianh duh nakhnga ka bawm ko, maw Bawipa. Amen!