Cabuai i rawl an ei lioah khan Jesuh nih a thawh hna i, “Nan
lak i pakhat nih hin nan ka rawi lai, ka sin i rawl a eimi nih hin,” tiah a ti
(Mark 14:8).
Thawngtha pali nih Jesuh nih a zultu
pawl he hmanung zanriah an ei lio ah a thih lai nak kong a chim mi an
tial. Cu lawng si loin, khua a dei hlan ah Piter nih a hlawt lai nak kong zong
an tial fawn (Matt. 26:69-75; Mk. 14:66-72; Lk. 22:56-62; John 18:15-18, 25-27).
Zan khuamui chupchap i Gethsemane dum an kal pah zong ah a zultu dang pawl nih
an hlawt lai nak ding kong a chimh hna.
Kan nunnak ah hin a caan ah kan hawikom
tha le kan dawt mi hna nih an kan hlawt an kan leirawi tiah kan ruah caan a um
tawn. High school karak dih ka te ah hin Kachin ram Phakant ah lunghring (jade)
kawl ah karak kal ve. Kan lawban (Tuluk
holh an hman i boss/employer ti nak a
si) cu Kachin mirum, kum 20 fai mino te a si. Thal ni lin lakah thlanhri puak
in lungvar cu kan kawl. Concrete tluk in a hak mi vawlei chungah lungvar cu
kawl a si i nifa te sobul pawng hra le thiarfung he kan kut pom dihlak le
thlanhri puak cun rian cu kan tuan. Lungvar man tha kan hmuh ahcun kan thabat a
rulh te ko lai ti mi ruahchannak he kan i hnek tualmal cio. Thla khat fai kan
tuan ah khin lungvar cu kan hmuh tak tak. A that ning cu a leng zoh hmenh in a hring
ci a lang. Nain, kan hawipa le kan lawban
pa nih an leirawi ca ah kan lungvar a that tluk in phaisa kan hmu ti lo.
Lungfak ngai in kanrak um. Zeihmenh chimrel khawh nak kanrak ngeih lo ca ah kan
thinlung lawng in kanrak tuar.
Kan hawile pakhat khat nih an kan
leirawi tikah kan lungfah lawng si loin kan i pehtlaihnak tiang zong a rawk kho.
Thinlung dam thannak ca ah remnak tuah a herh mi a um. Zeimaw caan ah a herh mi
cu kanmah lila nih midang kan ngaihthiam hna a herh caan a um theo. Cu cu
velngeihnak kan ti mi “grace” hi a si.
Kan Bawipa Jesuh nih khan a zultu lakah
pakhat nih a ka rawi lai ti a hngalh cia ko. Piter nih a ka hlawt lai ti zong a
hngalh i, a zultu dang zong nih an ka zamtak lai ti kha a hngalh ko. Nain, cu thil
vialte cu a hngal lo bang in a um i hmanungbik zanriah zong tha tein a ei pi
hna. Judas Iskariat nih tlangbawi pawl sinah a ka leirawi cang ti kha a hngal
ko nain, amah he rawl kho a dumter rih. Bible thiamsang cheukhat nih an chim
nak ah cun, upat peknak ca ah Judad Iskariat kha Jesuh nih a kehlei kam ah a
thutter tiah an ti. Piter nih a ka hlawt lai ti zong kha a hngal ko nain, a ke
a tawl piak. A zultu dang nih an ka zamtak dih lai ti kha a hngal ko nain, “ka
hawile” tiah a ti hna. Cu lawng hlah; an ca ah thla a cam piak rih hna (Johan
17:1ff). Cun: “Hi hi nan ca le mi tampi ngeihthiamnak ca ah ka thlet mi
biakamnak thisen a si” tiah a ti rih hna.
Kanmah pumpak miaknak le himnak duh ah
Judas Iskariat le Piter bantuk in Jesuh Khrih kan leirawi i kan hlawt caan a um
ko lai. Cu ve bantuk in Pathian biatak ah raltha le fek tein diar ngam loin, a
zultu dang bantuk in Jesuh Khrih kan zamtak caan zong a um ko lai. Cu ti i
Pathian duhnak he aa ralkah in kan nun i, lam hlat pi ah kan um ko lio zong ah,
Bawipa nih a kan ngeihthiam i a velngeihnak chungah a kan khumh zungzal ko.
Kanmah zong kan dawt mi, kan hawikom tha, le kan zumh mi minung nih an kan
leirawi, an kan hlawt, an kan zamtak tiah kan ruah tikah, Jesuh Khrih keneh
zulh in ngaihthiamnak nun kan ngeih ve ding ah Bible nih a kan cawn piak.
Thlacamnak:
Maw Bawipa, Judas Iskariat le Piter bantuk in nangmah kha
kan leirawi i kan hlawt theo ruang ah ka ngeithiam hram ko. Nangmah nih ka
cungah vel na ka ngeih i na ka ngaihthiam bang in, keimah a ka leirawi tu le a
ka hlaw tu kha ka ngaihthiam khawh ve hna nakhnga ka bawm ko, maw Bawipa. Amen!
No comments:
Post a Comment