Ka blog ka thawk hnu in pehzul in ca ka tial thiam rih lo. Siaherh in ka blog a ka leng tawn tu nan hmai khah a si ziar lo. Zeidang ka rian ah ka caan a dih i ka blog ah caan ka peh kho rih lo. A ruah zia ka thiam lei ko uh.
Tu kar hrawng cu mission tuanbia kong deuh ka rel. Mah lak ah cun W. C. B. Purser nih 1913 ah a tial mi "Christian Missions in Burma" cauk ka rel i theihtlei tampi ka chap. Cu lakah Purser nih Laimi kan holh a dan liangluang nak legend kong a tial mi hi ka ca ah theihtlei a si khun.
Laimi hi phun tampi in an ithen i a tlangpi in chaklei, thlanglei, le a laifang Laimi tiah then an si. Chaklei Laimi pawl nih Baibal chung i Babel Lungrual bantuk khin an holh a dan nak kong ah legend an ngei ve. A chim ning ah cun, hlan lio pi Laimi khua upa nih thlapa (the moon)mawt caan i a cheuchum lawng a van tawn khi an lung a tling lo. Zan fatin thlapa lai (full moon) lawng te sisehlaw tha tein zan khua ceu seh ti an duh. Cu ca ah nikhat cu hi ti hin khua an khang: Babel bantuk lungrual kan sak lai i thlapa cung tiang kan kai lai i kan duh ning in kan chiah lai i zan fatin thlapa a vang lai an ti. Cu ti cun khuaza um Laimi vialte nih Lungrual cu sak hram an thawk ti a si. Lungrual cu a sang chin in an sak tikah thlapa khuachia kha a thin a hung i cu lungrual cu tlu lak in a nam piak hna ca ah a cheu phu chaklei, a cheu phu thlanglei ti in an ithenthek dih i cu ti cun, an holh zong an idang cio dih ee ti a si.
Legend cu va si kaw, tuanbia ngaingai a si na loin, mah bantuk ruahnak kan ngeih mi tete hi hngalh awk ngai an si ka ti. Kan Baibal chung i Babel Lungrual zong hi hlan Judah miphun pawl nih an ingeih mi legend pakhat a si ve. Laimi nih kan ingeih mi khua-ruahnak (concept) a tel mi pawl hi khawmh suat le hlat hlai awk tlak an si ka ti.
