Pa Sui
2008 lio ah khan Barack Obama nih America ramhruaitu lutlai President rian a rak hmuh ruang ah Pu Thla Thawn nih Ks. 100,000/- a rak miak i Khuahlun Boarding Class caah a rak hlut deng, Khuahlun Education Foundation ca tu ah a hram Ks. 100000/- he a rak hlut. Obama nih a tuan hngami rian a chim tikah mi lung a rak hmui hringhran.
Kum hnih (term cheu) a vun tuan i tu hi mah ti cun ti law mah ti khan ti law..... timi ruahnak phun phun cheuh a tong. Mah lakah pakhat cu khrihfa set set maw a si Muslim dah ti hi zapi sin ah fiang tein chim ding. Obama nih hin ni khat khat cu Bill Cliton Bible ngan pi kha a zak in aa ceh te lai i pumh fel ngaknu pawl he biakinn bak ah Glen Beck i “Obama khrihfa a si lo” a rak timi kha a fianh te lai tiah upa lungfim nih cun an rak ruah nain ni hin ni tiang mah ngai cu a um rih lo ti a si.
America ramuknak phung nih hin zalawng te’n chimrel khawhnak le Pathian biak khawhnak cu fak pi’n a haakmi a si na’n a biaknak zei si ti a chim duh lomi President cu a dirkamh kho lo men. Thilsining theimi nih cun nihin ah hin cun khrihfa, Muslim, Roman Catholic ti le Jew biaknak hna hi president thimnak ahcun biaknak ngei lo ‘ka thei lo, ka zei poi loh’ timi nak cun thim deuh an si an ti.
President aa cuhmi pawl hi biaknak lei le ramuk phung constitution lei zeipoi zeipoi an hal theo hna. 1800 lio ah Thomas Jefferson he a rak i zuammi pa nih a biaknak chim a rak duh lo ruang ah zapi nih an rak uar tuk ko nain a rak tla. 1908 lio tan than ah William Howard Taft zong cu thiam thiam. Biaknak lei ah aa pee ngai mi Dwight Eisenhower hmanh 1952 lio tan mee suai lio ah a nu le a pa Jehovah’s Witness an si ruangah biakinn a phan bal lo i khrihfa phung dotu a si tiah an rak puh. Billy Graham sin ah ruahnak a rak hal i a rak timi cu, “Eisenhower, Pathian le na ram kha zum ko, zei tin?” a rak ti.
Cu zeipoi zeipoi lakah a harbikmi cu a liam cia kum 50 lio i John F. Kennedy lio tan ah khan a si. Nixon nih Kennedy hi RC a si kha chim len a duh lo nain zapi ko an buai cang. “Vatican puppet (Vatican Zohtee)” a si ko lai cu ta an rak ti. September 12,1960 ni ah cakei kaa luh ding in an sawm i Ok a ti hna. Greater Houston Ministerial Association ahcun pastor te cu “kei cu zei biak inn dah ka zumh ti chim ah ka ra lo, cu cu keimah ca lawng ah a biapimi thil asi, zei bantuk America ram dah ka zumh ti chim tu ah ka ra..” a ti hna. America cu biaknak le uknak aa dang tein a ummi ram, biaknak upa nih zei ah mee pek ding tiaha chimmi ram a si lo. Cun “ni hin ni ah cun kutdong nih a sawhmi pa hi RC pa a si ko nain, a hnu ah maw zei tik ah dik, Jew pa maw a si lo ah thumkawmh zum lo pa maw, Baptist pa maw a ho dik a sawh ve te ko lai...... kei cu nihin ah cun harnak tong ka si nain thaizing ah cun nangmah zong na si ve kho men ko... kan rampi lungngetnak a rawh te dah ti lo ahcun”
Kumzabu hnarcheu a luan hnu a tu ah cun Obama zong zei biakinn dah a zumh ti si lo in zei bantuk America dah a zumh ti chim phuan ve a hau cang laimi ah a tla. Ground Zero (innsang pa hnih rawhnak hmun) pawng ah Islam biakinn a sakter hnik hna ruangah khuami he an buai ti bantuk, thintawinak tete hi a phun phun in a chuak. Obama nih a donghnak bik ah a chim theomi bia cu ‘hrimh thannak le ho poh i khahnak’ kha a si tawn. A caan caan ahcun President nih hin a langhter awk ding zumhnak cu a mah pomning zumhnak tu kha a si theo.
Ref. Times Sept 13.2010
