A caan a phak tikah Jesuh
cu lamkaltu hna he khan cabuai ah cun an ṭhu. Annih cu a thawh hna i, “Sifahnak
ka in hlanah hin hi Lanhtak rawl nannih he ei ṭi hi ka duh hringhran.
Zeicahtiah Pathian Pennak chungah hi rawl hi a sullam taktak langhter a si hlan
paoh cu ka ei ti lai lo,” tiah a ti. Cun Jesuh nih hrai kha a lak i Pathian
sinah lawmhnak bia a chim hnuah, “Hihi i lak u law i hrawm u, zeicahtiah
Pathian Pennak a phanh hlan tiang cu, hi mitsur hang hi ka ding ti lai lo,”
tiah a ti. Cun chang kha a lak i Pathian sinah lawmhnak bia a chim hnuah a cheu
i annih cu a pek hna i, “Hihi ka pum a si, nan ca i ka pekmi cu. Keimah philh
lonak ah run tuah u,” tiah a ti. Cu bantuk ṭhiamṭhiam in zanriah an ei dih
hnuah hrai zong kha a pek hna i “Hi hrai hi nan caah ka thletmi ka thi in
khenhchihmi Pathian biakamnak a si (Luka 22:14-20).
Jesuh rian
tuannak kong hi Thawngtha pathum nih an tial tikah rawl dumtinak kong hmun tam
nawn ah hmuh khawh a si. Luka thawngtha chung lawng hmenh ah hmun riat ah rawl
dumtinak kong a tial. Hmun tam nawn ah Jesuh kha mi sual le ngunkhuai khawl tu
pawl sinah rawl a dum ti kan hmuh (Luka 5:27-32 cf. Mark 2:13-17; Mathai 9:10).
Pharasi pawl inn zong ah rawl a ei. Rawl an ei lio ah hlawhhlang nu pakhat nih
a ke ah zihmui a toih i a sam in a hnawh piak (Luka 7:36-50; 11:37f). Mary le
Martha zong nih an ta pa Lazaru thihnak in a thawhter ruang ah an lawmh. Nga
pahnih le changreu hlum thum in mi thong nga rawl a dangh hna. A thih i a
thawhthan hnu zong ah a zultu pahnih he Emmaus khua ah zanriah an i hrawm (Luka
24:13). Cu lawng hlah, a zultu dang pawl he Kalili tili kam ah nga an ei ti
(Johan 21).
Cu vialte rawl
dumtinak nak in a biapi deuh mi cu, vailam cungah a thih lai i a zultu hleihnih
he hmanung zanriah an dumti kha a si. Johan thawngtha nih Jesuh le a zultu pawl
hmanung rawl dumtinak kong cu hmun tampi ah biapi tuk in a tial (Johan
13:21-30). Hi hmanung zanriah kong hi Thawngtha pathum lawng si loin Lamkaltu
Paul zong nih Korin cakuat pakhatnak ah a tial ve (1 Korin 11:17ff).
Jesuh nih a
zultu pawl sinah a cahtak mi hna cu: amah philhlo nak ca ah kha hmanung zanriah
kha nan run pehzulh lai ti mi a si. Cun changreu le mitsur hang an ei an din
tikah amah temh-innak hngalhthannak ca ah a si lai i, cu temh-innak le midang
zawnruahnak nun cu an i nunpi nak hnga a cah tak hna. Cu cu 1Korin 10 ah Paul
nih koinonia—midang he i hawikomhnak,
a si lo ah, Jesuh a thi le a pum i hrawm tiah a chim mi khi a si.
Kum 40 fai a si
mi pa cu khensa zawtnak ruang ah ruahlo pin a thi. A nupi le a fale pahnih cu
ngaktah in a kaltak hna. Cu pa cu a nun lio ah sa buti arak duh ngai mi a si ca
ah, a nupi nih a va philhlonak ah ti in sa buti cu an rawlkho ah zerh khat voi
khat in a hun ve lengmang. Rawl an ei pah ah khin a fale kha hringtu an pa nih
a dawt hna nak le a nun lio tuanbia kha a chimh lengmang hna. Cu ti cun a fale
zong nih hringtu an pa dawtnak kong kha an philh kho ve lo. An pa nih a thihtak
ko hna nain an pawng te ah an pa thlarau nih a kan umpi i, amah nih a kan zohkhenh
ko tiah an zumh. Cu zumhnak nih cun an nun zong kha lam a hmuhsak hna i a
sersiam hna.
Jesuh nih a
zultu pawl sinah, “Hi hi keimah philhlonak ca ah nan run hman tawn lai” (Luka
22:14ff) a ti mi khi a cung i nu farual hna tuanbia nih hin a sullam a fianter
ngai rua ka ti. Thla khat voi khat Bawipa zanriah kan hman tik lawng ah si loin,
inn ah siseh khoika kan umnak hmun paoh i rawl kan ei tikah Jesuh nih a kan
cahtak mi ruat bu le kan ca i a temh-innak ruat bu in kan ei kan din awk a si. Cu
ti kan tuah tikah Jesuh nih Thlarau in a kan umpi nak le lam a kan hruainak kan
fiang lai. Cun zumtu kan sinak nun, midang ca ah nunnak pek le midang rianhnak
nun, zong a kan sersiam lai. Hlan ah cun Khrihfa cheukhat nih rawl kho an ser
tikah, “Jesuh ca ah” ti in a hlei in an ser chih lengmang. Nang le kei
zeitindah Bawipa zanriah kan hman?
Thlacamnak:
Bawipa, khuazei hmun i rawl kan ei tik
paoh ah nangmah kha kan hngalhter camcin ko. Kan rawlkho ah nangmah nih kan
dumpi ko, maw Bawipa. Nangmah cu kan thlarau rawl a khim ter kho tu le diriamh
ter tu nunak rawl (changreu) tak tak na si kha kan philhter sawh hlah. Amen.
No comments:
Post a Comment