Ni 3: Mi Ngan Si a Duh Mi Cu

Cun a zultu hna lakah khan, ahodah a ngan bik ah ruah awk a si, ti bia alnak kha a chuak. Jesuh nih a thawh hna i, “Jentail mi siangpahrang hna nih cun an michia kha a lal in an lalhnawh hna i nawl ngeitu hna kha ram ca ‘Thil ṭha tuahtu’ ti an si tawn. Sihmanhsehlaw nannih cu hitihin nan si awk a si lo: nan lak i a ngan bik kha a ngakchia bik bantuk a si awk a si i hruaitu a simi kha sal bantuk a si awk a si (Luka 22:24-26).

Jesuh nih cun ka Pa nih zeizong vialte kha ka kut chungah a ka pek dih i ka Pa sinin a rami ka si i ka Pa sinah ka kir ṭhan lai ti kha a hngalh caah rawl an ei lioah cun cabuai khan a tho i a puan aa chiah hnuah kut hnawhnak puan kha a lak i a tai ah aa menh i khengpi chungah ti kha a thlet i a zultu kha an ke a ṭawl hna i kut hnawhnak puan in a hnawh hna (Johan 13:2b-5).

Thawngtha pali nih a tial mi zultu hna kong rel cu zumhnak ah a der ngai mi hna kan ca ah thazang laknak pakhat a si. Kanmah cio bang zultu hleihnih kha anrak tling ve hrim hrim lo, Jesuh Khrih kha kum thum kheng te a hnu anrak zulh hnu zong ah. Jesuh nih vailam cung ah thah a si lai kha a hngalh cang tikah, a zultu pawl he hmanung zanriah an ei kha a si. Cu zanriah an ei cuahmah lio ah cun a zultu pawl cu “a hodah anlak ah mi ngan bik a si” ti mi kong a thlithup in an i al pah (Luka 22:24). Kum pi kum thum kheng te an zulh hnu, Jesuh nih vailam ah thah ka si cang lai tiah a chimh cuahmah hna bu ah, a zultu pawl cu mi ngan si le mi cung cuan duhnak kong ah an buai khim. Jesuh nih vancung pennak kong a cawnpiak mi hna, dawtnak le ngaihthiamnak kong a cawnpiak mi te hna kha an thlau dih i pumpak miaknak le hmunhma i cuhnak ah an buai.  

Caan tampi cu kanmah le kanmah kan i hngalh lo karah mi ngan si duhnak, mi cung cuan duhnak, hmunhma kawl duhnak, le kanmah pumpak ca thatnak kawl duhnak lungput khi kan thinlung ah a chuak theo. Cu bantuk lungput thalo ruang ah cun a si rua, nihin khrihfabu tampi lak zong ah pakhat le pakhat i hmuhthiamlonak, remlonak, buainak le thencheunak a chuak lengmang. Pastor cheukhat nih, “Kan nih cu a cawng mi kan si. Cu ca ah khrihfabu chung nawlngeihnak cu kanmah ta a si awk a si” tiah an khrihfabu kha a uk in uk an timh hna. Cu bantuk pastor cu company hmete CEO bantuk an si. Anmah duhnak lei hoih lawng in khrihfabu kalpi an duh. Anmah he ruahnak aa khat lo mi member le hruaitu kha pheu le thangchiat an timh tawn hna. Khrihfabu chung hruaitu (deacons) cheukhat ve nih, “Pastor cu kan in hire mi hna nan si. Cu ca ah zeitik paoh ah kan in fire khawh mi hna nan si” tiah an ti ve. Cu ti cun pastor le hruaitu cheukhat nih khrihfabu hi company pakhat bantuk men in kan hmuh tikah, Bible nih a kan hmuhsak mi pumpek nun le midang rianh nun kha kan thlau i mah pumpak miaknak kawlnak ah kan ser tawn. Khrihfabu hi Jesuh Khrih a pum a si i kan nih cu Bawipa innchungkhar pakhat kan si ti mi ruahnak cu duhsah tein a tlau cuahmah. Cu bantuk ruahnak thalo nih cun khrihfabu ngandamlonak lawng si loin, miphun rawhralnak le vaivuanhnak tiang a chuahpi khawh.

A zultu pawl cu thil biapi a si lo mi kong ah an buai ti kha Jesuh nih a hngalh tikah, cabuai khan a tho i innka hram i ke tawlnak ca ah an chiah mi khengkuar pi, ti le taval kha a va lak. Judah phung ah cun mi pakhat nih a hawile rawl ei a sawm hna tikah innka hram ah khin ke tawl hmasa lengmang a si. Jesuh zultu pawl cu an ke tawl loin inn chung ah cun an lut diam. Aho zong nih an Bawipa a si mi Jesuh ke tawl piak cu chim lo, an zultu hawile ke tawl piak ding an ruat lo. Cu ti midang ke va tawl piak cu, Judah phung ning ah, sin um rian a si. Cu ca ah aho hmenh nih sin um rian tuan ding cu an i tim kho cio lo. Cu lio ah cun Jesuh nih a zultu cu pakhat hnu pakhat in an ke a tawl piak hna. An cung i kha thil lianngan a tuah mi kha fiang deuh in an hgalh khawh nakhnga, Jesuh nih: “nan lakah mi ngan si a duh mi nih hi bang in nan tuah ve awk a si” tiah a cawnpiak hna.

Jesuh nih a zultu pawl an ke a tawl piak mi hna nih a niambik tangdornak nun a kan hmuhsak. Cu bantuk tangdor nun ah cun mi ngan sinak taktak cu a um. Phung dang in kan chim ahcun, ral thatnak taktak kan ti mi khi tangdor nun ah a um mi a si. Cu tangdor nun cu zumtu pawl nih kan i zohchun awk le i nunpi awk tuanvo kan ngei. Nang le kei tah cu tangdor nun le midang rianh duhnak nun cu kan i nunpi kho ve maw? A si lo ah, mi ngan si duhnak, mi cung cuan duhnak, mah pumpak miaknak kawl le hmunhma kawl duhnak lungput cu dah kan i tlaih zungzal ko lai? "Mi ngan si a duh mi cu mi tang ah an i dor awk a si" ti mi hi Jesuh Khrih cawnpiaknak a si.

Thlacamnak:

Maw Bawipa, na zultu hna bang in midang mit hmuh ah that aa cuh mi le mi cung cuan a duh mi ka si ti na ka hngalh. Sin um thinlung, tangdornak thinlung, ka pe hram law, cu ti cun mi ngan sinak taktak cu ka hmuh lai. Mah pumpak hlawknak a kawl mi si loin, midang thatnak ca ah a nung mi ka si khawh nakhnga ka cawnpiak ko, maw Bawipa. Amen!