Ni 6: Nan Ca I Hmun Va Timh Chung Awk ah Ka Kal

Khuaruahhar lungrethei in um hlah u. Pathian kha zum u, keimah zong kha ka zum ve u. Ka Pa inn chungah khaan tampi a um ko i cuka i nan caah hmun va timh awkah ka rak kal lai. Cu bantukin si hlah seh law hitihin kan chim hna hnga lo. Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai (Johan 14:1-3).

Zumtu a si mi nih kan thih tikah kum cang hmunhnak ram nuam (vancung ram) ah kan kal lai tiah kan zumh dih. Cu ram cu sifah harnak le lung retheihnak an um ti lonak ram a si tiah an ti. Hi vawlei sifahnak le harnak phun zakip hi kaltak in cu ka ram lei kal cu i ngaihhlang ngai awk kan si. Nain, mi tampi nih cu ram nuam kal cu kan zenh ngai. Cu ca ah thihnak hi a si khawh chung in hrial kan i zuam tawn. Phun dang in chim ahcun, thihnak hi raltha tein a tong ngam mi kan tlawm ngai.

Jesuh Khrih kha a zultu pawl he hmanung zanriah an ei lio ah amah thihnak ding kong a chimh hna. Anih cu thihnak kha raltha tein a ton. Rom ralkap kut in vailam ah thah a si lai nak le, a thih hnu ah a zultu pawl nih a Pa Pathian rian an run pehzulh ding kong a chimh hna. Jesuh nih a zultu pawl cu, “nan ca i hmun va timh chung awk ah ka kal chung lai” tiah a chimh hna. Amah a temh innak le a thihnak kha an mit in an hmuh lai i cu bantuk cun a zultu pawl zong nih harnak le hnahnawhnak an ton ve lai ding mi zong a chimh hna.

Johan thawngtha nih cu kong cu fiang khun in a kan chimh. Jesuh nih a zultu pawl kha nanmah lawng kan kaltak hna lai lo, paraklete (hnemtu/fim chim tu) Thlarau kan thlah hna lai tiah bia a kamh hna. Mitsur nge le a ruang an i peh bang in amah he i pehtlai ding in a forh hna (Johan 15). Cun, pakhat le pakhat nan i daw lai tiah bia a cah fawn hna. Kha hmanung zanriah an ei lio i Jesuh nih a chim mi lakah, aa dawh bik mi cu a cung ah kan rel mi Johan 14:1-3 ah kan hmuh: “Khuaruahhar lungrethei in um hlah u. Pathian kha zum u, keimah zong kha ka zum ve u. Ka Pa inn chungah khaan tampi a um ko i cuka i nan caah hmun va timh awkah ka rak kal lai. Cu bantukin si hlah seh law hitihin kan chim hna hnga lo. Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai.”

Hi Jesuh bia rovuih hi nan rel cio tikah zeitindah nan nun ah Bawipa nih bia an chimh hna? Zawtfahnak le khawn dennak pakhat khat ruang ah thihnak he nan i naih caan a um maw? Jesuh Khrih hnu nan zulh mi kong ah lung awtawm le zumhnak kong ah lung fiang lo in nan um caan a um maw? Kan thih hnu pinlei ah khin zungzal nunnak a um taktak hnga maw ti in lung awtawm in nan um caan a um maw? Thih hnu pinlei zungzal nunnak kong i lung awtawm in nan um ruang ah Khrihfa nan sinak thazang a der ter sual maw? Jesuh Khrih nih a zultu sinah fiang tein a chimh mi hna cu: “Ka Pa inn chungah khaan tampi a um ko i cuka i nan caah hmun va timh awkah ka rak kal lai” ti a si. Hi nih a langhter mi pakhat cu: zumtu kan nunnak ah harnak le tihnung phun zakip tong ko hmenh uhsih, thinphan thlalaunak um loin fek le raltha ngai in kan nun a herhnak a si. Zei bantuk thil kan ton hmenh ah, khuaruahhar le lung rethei in um loin, lungthin dihlak in Bawipa a zum mi le aa bochan mi kan si ding ah Bible nih a kan cawnpiak.