Ni 9: Olive Tlangbo

Cun Jesuh cu a chuak i a tuah tawn bantuk khan Oliv Tlang ah a kal i a zultu kha a sinah an kal ve (Luka 22:39).

Zeiruang ah dah Zisuh kha Olive tlangbo ah a kal i cuka hmun cun thla a cam pah in amah tlaihnak ding cu a hngah hnga?

A ngai ngai ti ahcun a zultu pawl he hmanungbik zanriah an einak inn kha tlangbawi ngan inn in lung cheh tluk hrawng lawng a hlat mi a si. An ka tlaih lai ti a hngalh ko ahcun Olive tlangbo i va kal cu a herh theng hnga maw? An tlaih taktak hnu ah cun tlangbawi ngan inn, Sanhedrin pawl hmaika ah a bia an ceih ko fawn. Gethsemane dum i a um mi Olive tlangbo kha zanriah an einak hmun khan lam hlat nawn ah a um ca ah minit 20 le 30 tluk ke in kal a hau. An tlaih hnu ah khan cu Olive tlangbo cun a kut an temchih bu in tlangbawi ngan inn ah cun an run pi. Ziah an tlaih ding kha a hngalh cia ko ahcun, zanriah an einak inn ah khan a zultu pawl he thlacam in Judas le Judah biaknak upa pawl an rat cu an hngah ko hna hnga lo?

Luka thawngtha nih cun Zisuh kha a thih caan a naih tikah nifa te in Olive tlangbo ah a kal i thla a cam lengmang tawn tiah a kan chimh. Johan thawngtha nih cun, Zisuh cu a zultu pawl he Olive tlangbo ah an i tong lengmang tiah a kan chimh fawn. Zisuh ca ah hi Olive tlangbo hi sullam a ngei ti cu a fiang. Zeiruang ah dah a si hnga?

Prophet Zakhariah nih a vun kan fianh mi pakhat a um. Olive tlangbo in Jerusalem khuachung ah La fate cit pah in a luh nak kong rel tikah, Zisuh nih prophet Zakhariah chim mi bia a tlinnak a langhter. Zakhariah nih cun hi ti hin arak chim: Judah siangpahrang cu La fate cit pah in Jerusalem khuachung ah a lut lai. “Khi ni ah cun a ke cu Olive tlangbo ah an diar lai” (Zakha 14:4). “Cun Bawipa cu vawlei cung vialte siangpahrang a si lai; khi ni ah cun Bawipa lawng lawng cu Bawipa a si lai i a min lawng lawng cu min a si lai” (Zakha 14:9).

Zisuh a chuah lio ah khan tuukhal le nichuahlei mifim hna nih Judah siangpahrang a chuak mi biak awk ah kan ra tiah an ti. A hung thang i a Pa rian a tuan tikah, vancung pennnak kong tahchunnak le cu vancung pennak thawnnak kong kha a cawnpiak hna. A zultu pawl kha: “Na pennak tlung cang ko seh, vancung bantuk in leicung ah na duhnak tling cang ko seh” tiah thlacam a chimh hna.

Rom ralkap nih vailam ah an tah i a kut thiar in an khenh chih hnu ah hi ti hin a lu cungah ca an tar: “Amah hi Judah siangpahrang, Zisuh cu a si” (Matt. 27:37).

Zisuh Olive tlangbo a kal i cu ka hmun ah Rom ralkap nih an tlaih mi nih a sawh duh mi pakhat cu, a Pa Pathian mission rian a tuan mi a langhternak a si. Cun, prophet nih anrak chim chung mi Judah siangpahrang a sinak langhternak ca ah a si fawn. Zisuh nih a zultu  sinah a chimh mi hna cu: “Vancung pennak cu nan lakah a um” (Luka 17:21) tiah a ti. Pathian duhnak kha kan duhnak nganbik ah kan chiah i kan thinlung kha a dihlak in Bawipa kan pek ahcun, vancung pennak tehte kan sinak a lang lai. Bawipa duhnak a kawl mi kan sinak hnga Bawipa lila nih lam kan hmuhsak sehlaw, kan thinlung mit auter hram seh.

Thlacamnak:

Maw Bawipa, nangmah cu kan siangpahrang na si. Na duhnak kha kan hngalhter law kan tuah khawh nakhnga kan bawm ko. Kan nunnak a dihlak nih nangmah min thatnak le lianngannak cu langhter ko seh. Amen!