Ni 8: Thihnak Hmaika ah Thangthatnak Hla

Cun hla fung khat an sak dih in Oliv Tlang ah khan an kal (Mark 14:26).

Zisuh le a zultu pawl hmanung zanriah an ei kha zantim hlan deuh hrawng ah rak i lim dawh an si. Kha hmanung zanriah an ei ah khan, Zisuh nih chang kha a cheu i a zultu he an i hrawm; an ke a tawl piak hna; Judas nih a leirawi lai nak kong a chimh hna; cu lawng hlah, a zultu pawl nih an i nunpi awk le zulh awk ah hmanung bik cawnpiaknak zong a ngeih hna. A siaherh mi vialte kha tha tein a chimh dih hna. Cu hnu ah, Rom ralkap le Judah biaknak hruaitu upa cheukhat nih an tlaih nak ding hmun, Gethsemane dum lei kal ding in a zultu pawl cu a timh pi hna. A caan kha a naih thluahmah cang. Zisuh le a zultu pawl nih Gethsemane dum an kal hlan te, hmanung zanriah an ei dih, ah thil pakhat an tuah mi a um. Cu cu: thihnak hmaika ah thangthatnak hla an sak mi kha a si. Kan Bible nih, “Cun hlan fung khat an sak hnu ah Oliv Tlang ah khan an kal” tiah a kan chimh.

Lanhtak Puai Zanriah (Passover Seder) a donghnak i hla an sak tawn mi cu Sam 118:1, 29 a si. Hi hla hi Mark 14:26 nih a chim duh mi a si. Sam hla phuah thiam nih cun: “Bawipa cu a that i a dawtnak cu zungzal in a hmunh caah lawm tuah uh. . . . a dawtnak fek cu zungzal in a hmun” tiah a ti. Thihnak tihnung nih a ka hngah ko ti le, harnak chungah ka um ti kha Zisuh nih a hngalh ko nain, zeitindah cu thihnak hmaika ah cun thangthatnak hla cu a sak khawh hnga? Kan ral nganbik thihnak hmaika ah Pathian bochan in kan nun a herhnak cu Zisuh le a zultu nih an kan hmuhsak.

Harnak le lung retheih caan i Pathian thangthat cu a har ngai ngai mi a si. Pathian kan i hngahchannak lawng in tuah khawh mi a si. Cu Pathian hngatchannak nih cun thlarau thawnnak, lung daihnak le ruahchannak a kan pek. Thihnak hmaika ah thangthatnak hla sak cu “kan nunnak ah zeibantuk hmenh tlung ai kun, zeibantuk harnak zong tong ai kun, Bawipa nih a ka chanh ko lai” ti khi a si. Zisuh zong kha Bawipa thangthatnak hla sak pah in Gethsemane dum, Oliv Tlang lei ah a zultu he an kal.

Cu cu zultu pawl nih an i nunpi. Lamkaltu 16 chungah kan hmuh bantuk in, Pawl le Silas kha Philipi khua ah an tlaih hna i an kut le ke hren bu in thong ah an thlak hna. Cathiang nih cun, Pawl le Silas kha thla an cam i Pathian thangthatnak hla an sa tiah a kan chimh (Lamkal 16:25). Thessalon khua mi sin zong ah Pawl nih, “a zungzal in i lawm uh, a zungzal in thla cam uh, zeibantuk caan zong ah Bawipa sinah lawmhnak bia chim uh” (1Thess 5:16-18) tiah a forh hna. Thihnak hmaika ah thangthatnak hla sak cu a fawi lo. Nain, an sak taktak tikah Pathian nih khuaruahhar in lam a hruai hna.  

Kan Bawipa Zisuh cu thihnak hmaika ah a zultu pawl he Bawipa thangthatnak hla an sa. Zisuh a thihnak le a in tuarnak ruat bu in Sam 118 hi thlacamnak he rel cio ding in kan sawm hna.

Thlacamnak:

Maw Bawipa, na thatnak le dawtnak cu zungzal a hmunh ca ah kan lawmh. Thihnak le harnak chungah ka um tik zongah, nangmah hngatchan in thangthatnak hla a sa kho mi ka si khawh nakhnga ka bawm ko sawh. Amen!