Ni 7: Ca Cawn Nili Nawl Peknak

    Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo (Johan 15:5).

Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si. Ka Pa nih a ka dawt bantukte in kei zong nih kan dawt ve hna; kan dawtnak hna chungah hin um ko uh. Ka Pa nawlbia kha ka ngaih i a dawtnak chungah ka um bantukte hin ka nawlbia nan ngaih ahcun kan dawt hnanak chungah hin nan um ve lai. “Ka lunglawmhnak kha nan chung-ah a um i nan i lawmhnak cu a tlin nakhnga, hi bia cu kan chimh hna. Kei ka nawlbia cu hihi a si. Keimah nih kan dawt hna bantukte hin pakhat le pakhat i daw u. Mi nih a hawile caah dawtnak ngan bik a ngeih khawhmi cu an ca i a nunnak pek hi a si (Johan 15:8-13).

Bawipa Zisuh le a zultu hmanung zanriah an dum lai ca cawn ni li ni khi “Maundy Thursday” tiah hngalh a si. “Maundy” ti mi biafang hi Latin holh biafang mandatum in a ra mi a si i, a sullam cu nawl peknak (commandment) tinak a si. Kha hmanung zanriah an ei lio ah khan Zisuh nih a zultu pawl sinah a biapi mi nawl peknak a tuah mi an um. Cu cu zumtu hna nih cinken le nunpi awk tlak an si. Hmanung zanriah an ei lio ah khan, mitsur hang le changreu kha a pek hna i, Zisuh nih, “hi hi keimah philhlonak ca ah nan run hman tawn lai” tiah a zultu pa hleihnih kha a cah hna (Luke 22:19). An ke a tawl pah hna ah “pakhat le pakhat nan run i zohkhenh lai” tiah a cah fawn hna. Cun, Johan 15 chung ah cun, “ka chungah um uh” cun “keimah nih kan dawt hna bantuk in pakhat le pakhat i daw uh” tiah a cah rih hna. Khrih chung i um/nun cu zeidah a si hnga?

Zisuh nih vawlei cung i a Pa mission rian kha a lim cuahmah cang. Rom ralkap kut in thah ka si lai ti a hngalh cia cang. Cu ca ah vailam cung thih ding kha ready a si cang. Cu tikah Zisuh nih a zultu pawl sinah biapi ngai in a cah tak mi hna le nawl a pek mi hna cu: “ka chung ah um uh” ti a si. Cu thil a fianter tu ah mitsur ruang le a nge in tahchunnak a pek hna. A chim duh mi cu, pumsa in an sinah a um ti lo hnu zong ah a zultu pawl nih Zisuh he pehtlai tein an nun a herhnak kong a si. Cu cu nihin zumtu kan dihlak ca zong ah a si ve. Kan thlarau thazang thawnnak le ngandamnak ca ah Zisuh Khrih he tha tein pehtlaihnak kan ngeih a herh. Cu pehtlaihnak cu thlacamnak, Bible relnak, midang kha Zisuh dawtnak kong chimhnak te hna in kan tuah khawh mi an si.

Zisuh Khrih chung ah fek tein hram a bunh mi zumtu kan si i, thlacamnak le Bible relnak in amah he pehtlaihnak a ngei mi kan sinak cu nifa kan nun le tuahsernak ah ah a lang tawn. Zisuh nih, “A ngan a dam mi thingkung nih thei tha a tlai i, kung chia nih thei tha lo a tlai” tiah fiang tein a chim (Matt. 7:17). Zisuh nih a zultu pawl sinah biapi ngai in a cah mi hna cu, a ka zultu nan sinak hi nan nunnak ah a langh awk a si ti a si. Phun dang cun, Zisuh zultu kan sinak cu midang zawn kan ruah hna nak, sifak santlailo kan bawmh i kan zohkhenh hna nak, duhdanh ngei loin mi kip cung ah dawtnak kan langhter mi ah khin a lang tawn. Cu zumtu nun cu chim rel a fawi tluk in i nunpi awk ah a har ngai. Cu ca ah Zisuh nih, “ka chung ah um uh” law “keimah ah hin hram bunh uh” tiah a zultu a chimh hna kha a si.

James le Johan unau hna nih Messiah pennak chung an luh tikah Zisuh keh le orh leikam thutdan an hal lio ah khan Zisuh nih a leh mi hna cu: “Nan ka hal mi nan hngal lo. Ka din ding mi hrai hi nan din khawh lai maw? Tipil ka in ding ning hin nan in khawh ve lai maw?” ti a si (Mark 10:38; cf. Luke 12:50). Hi hi hmanung zanriah an ei lio ah Zisuh nih a zultu pawl a cahtak mi hna, “keimah philhlonak ca ah nan run hman tawn lai” ti mi he khan an sullam aa lo. A chim duh mi cu, vawlei ca i kan intuarnak hi nan nih zong nih nan i zohchun i nan i nunpi awk a si ti nak a si. Cu cu ca cawn ni li nawlpeknak kan ti mi Zisuh bia rovuih a si. Hi Zisuh nawlpeknak hi nifa kan nunnak ah kan i nunpi kho maw? Khrihfabu chung kan i thithruainak le kan minung hawi he kan i pehtlaihnak ah kan langhter kho maw? Kan zumhnak in kho mi thingkung nih thei tha maw a tlai, thei tha lo dah? Pumpak cio in si seh, khrihfabu in siseh, a cunglei biahalnak hi kan ngeih cio ding ah kan sawm hna.

Thlacamnak:

Bawipa, na bia hngalh nak le, nangmah biak awk le, nangmah aw ngaihnak ding le, nangmah he i chawnhbiak nak ca ah, nangmah chungah ka khumh ko sawh. Midang cung ah a tak dawtnak a langhter kho mi le thingkung tha bang thei tha a tlai mi ka si khawh nakhnga ka bawm ko sawh, mawi Bawipa. Amen!