ZAISAWMREL

Pu G. Biak Nawl
Kan Laibiafang ah, pasawmrel, zaisawmrel, rawlsawmtuk timi hi pupa chan ah rak hman tawnmi a si. Sahrang a kaap kho nih an sahrangkaap hawi an sawm hna i mizapi kawh in pasawmrel puai an rak tuah tawn. Cubantuk in ngaknu inn i ihpung tlangval hna le ngaknu hna (sawmmi) hla in an i hloi, bia an i leh cu zairel ti a si, cu hla vialte cu hmunkhat ah sakti le laam a hung si tikah zaisawm kan rel an rak ti tawn. "Ar aw khuan ser rih hlahlaw, kan ngaih lung maw awi hlan ah , tuzaan bang maw ti khei rem dawh te he, zaisawm kan rel ti len lai," tiah pupa hla a um . Cucaah, stage show, live show, music festival phun khi a si ve.
Zai cu hla a si. Phun-zai-tlawh-ciar-biatam khi zai tiah kan ruah bik tawn. Asinain, phun (hmur cawlcangh), zai (aw nem, awsang chuah), tlawhciar (umchung tisa tlawh hluahmah), biatam (midang ngiar), timi pawl hi hlasak phun ah an rak telh caah zai ti a rak sinak a rak si leh lam.
Sawm timi cu, kawh-auh, pumhkhawmh khi a si i, tuakrelnak ( kanaan) sawm (paak, sawm, za tbk.) kha thawhkehnak biafang a si___ paak pumh cu sawm a si tibantuk khin, a sinain, 10 in 99 tiang lawng ti ri khiahmi phun cu a si lo. Rikhiah cu kanaan a si i, pasawm, rawlsawm, zaisawm timi hi cu a tiluan aa dang. Tc. pathongrel, pazarel, pasawmrel tiin ri a um lo, hman zong a si lo.
Rel timi cu, sak, chim, tuan ti khi a sawh caah, chim kem zong in, sakrel, chimrel, tuanrel, tawlrel ti an si tawn. Kanaan rel theng lawng khi a si lo. Lairel kan timi ahcun, khuakhan, ceihkhan, riantuan tinak a si. Avoi (107)nk BBC ( atu MBC) Civui pi Hakha i rak tuah lio ah, tarpawl nih , "Pathian zaangfahnak in "Nosawm kan rel ta manh," an rak ti. A sullam cu zaa-ngaan, thangthar, seino tampi,(phuntling) kan hmu ta manh tinak a si. Cucaah, zaisawmrel ti cu, hla phuntling kan sa, hla tampi kan sa, kan tawlrel tinak a si, music festival tinak a si hnga.