PUANLAANG

Pu G. Biak Nawl

Puanlaang timi hi kan pupa holhfang kan thlautaak cangmi a si. Puanglaang timi nih zei sullam dah a ngeih? Puan timi cu kan i aihmi puan, kan i vorhmi puan kha a si ko i, thilthaan tinak a siko. laang timi cu laan timi biafang in a rami a si i, tei; saankanh; lanh; lanhtaak; ti khi sawh duhmi a si. Cucaah, puanlaang timi cu teihnekchuahnak puan-zaar tinak a si. Miraang nih banner an timi khi a si i, Kawl nih awnglan tiah an rak ti ve. Cucu, a hnu deuh ah cun Miraang nih flag an timi le kawl nih alaan an timi ah khin a vaa chuah.

Kan pupa hna nih puanlaang cu zei can ah dah anrak hman kan ti ah cun, lai nipi ni, sunparnak ni le teinak, sawmtuk, lianngannak caan ah khin anrak hman tawn. Puanlaang cu mah kuttah mi puanraang (zo puanraang phun)khi a rak si i, a hnu cun khiangraang thaan cu an hman.

Puanlaang cu rua pumtha paar ah temh in thlai an si i, thli nih a lek hna tikah a puakmi thawng a thang lulhmalh. Ral thah khuan-ruh bunh a si ah cun, rua puntha, pumthum ah puanlaang cu thlai an si i, a pawngah lungdonh a um lai. Cun lungdonh pawng cu zalampi a kal lai. Cubantuk in, philhlonak lungdonh le zawl(a ruak hmuh lomi mithi lungdonh) a si ahcun lungphun hnulei a cungdot ah puanlaang cu ruapum pumthum in thlai an si lai. Cubantuk in puak an tuah tik zong ah philhlonak lungdonh le lungphun an tuah ve i, puanlaang can ah thilzun zong thlai an si theu. Cuticun lai sunparnak he aa pehthlai mi, midang nak in thil tikhawh deuhnak le teinak phunphun a si mi; ral tei, rawl tampi ngeih, sa tampi kah ti bantuk can ah hmelchunhnak i an thlai mi puan cu puanlaang ti cu a rak si.

1973 kum lio i rak suaimi kawlram phunghram ah khan alaan timi kha, lai holh leh mi ah puanlaang ti in a um kha kan hmuh (BSPP Manawcript11973). Cucaah, tuchan seino kan fale nih hmanmi laizo holhfang thantaar ai ah khin puanlaang ti tu in kan hman ve awk a si ko hnga. Thantaar timi hi holh no deuh a si i, a sullam tu cu thannak hun taar mi tinak cu a si thiamthiam ko. 1949 kum April thla ah an rak tuah mi Hakha Tipil Khrihfabu kum 50 Jubilee lio ah an rak sah mi hlapi cu, “Puanglaang kha lek u,” timi a si, tiah cu lio i mino huraitu a rak simi Pu Luai Kung nih a kan chimh.